आजरा (प्रतिनिधी) :
विद्यार्थ्यांनी नाट्यकलेची आवड जोपासून मराठी रंगभूमीच्या समृद्ध परंपरेचे संवर्धन करणे काळाची गरज आहे, असे प्रतिपादन प्रा. विनायक चव्हाण यांनी येथे केले. आजरा महाविद्यालय, आजरा येथील मराठी विभाग आणि विद्यार्थी विकास विभाग यांच्या संयुक्त विद्यमाने आयोजित 'मराठी रंगभूमी दिन' कार्यक्रमात प्रमुख वक्ते म्हणून ते बोलत होते. कार्यक्रमाच्या अध्यक्षस्थानी महाविद्यालयाचे प्रभारी प्राचार्य डॉ. किरण पोतदार होते.
कार्यक्रमात मार्गदर्शन करताना प्रा. विनायक चव्हाण यांनी मराठी रंगभूमीचा गौरवशाली इतिहास, परंपरा, सामाजिक आणि सांस्कृतिक योगदानावर सविस्तर प्रकाश टाकला. ते म्हणाले की, "मराठी रंगभूमीने सातत्याने समाजप्रबोधनाचे प्रभावी माध्यम म्हणून मोलाची भूमिका बजावली आहे. नाटक हे केवळ मनोरंजनाचे साधन नसून समाजातील वास्तव, मानवी नातेसंबंध, ज्वलंत प्रश्न आणि परिवर्तनवादी विचार मांडणारी एक सशक्त कला आहे." या वेळी त्यांनी रंगभूमीच्या जडणघडणीत योगदान देणाऱ्या दिग्गज नाटककार, दिग्दर्शक व कलावंतांच्या कार्याचाही आढावा घेतला.
अध्यक्षीय मनोगतात प्रभारी प्राचार्य डॉ. किरण पोतदार यांनी मराठी रंगभूमीला महाराष्ट्राच्या सांस्कृतिक वैभवाचे प्रतीक मानले. विद्यार्थ्यांच्या सर्वांगीण व्यक्तिमत्त्व विकासासाठी नाट्यकला आणि सांस्कृतिक उपक्रमांचा सहभाग अत्यंत उपयुक्त असल्याचे त्यांनी नमूद केले.
कार्यक्रमाचे स्वागत व प्रास्ताविक मराठी विभागप्रमुख डॉ. आनंद बल्लाळ यांनी करून रंगभूमी दिनाचे ऐतिहासिक महत्त्व विशद केले. सूत्रसंचालन डॉ. आप्पासाहेब बुडके यांनी केले, तर आभार प्रा. सुषमा नलावडे यांनी मानले.
या प्रसंगी प्रा. योगिता भोकरे, प्रा. वैशाली देसाई, अरमान दड्डीकर यांच्यासह सांस्कृतिक विभागाचे विद्यार्थी आणि प्राध्यापक वर्ग मोठ्या संख्येने उपस्थित होता.
