आजरा:
रस्त्यावर सापडलेले रोख रकमेसह महत्त्वाचे दस्तऐवज असलेले पाकीट मूळ मालकाला परत मिळवून देत येथील पंडित दीनदयाळ विद्यालयातील दोन विद्यार्थ्यांनी प्रामाणिकपणाचा नवा आदर्श घालून दिला आहे. त्यांच्या या सचोटीबद्दल शाळेसह परिसरातून त्यांच्यावर कौतुकाचा वर्षाव होत आहे.
येथील पंडित दीनदयाळ विद्यालयात इयत्ता सहावीमध्ये शिकणारे विद्यार्थी कु. संदेश कोरे व कु. नैतिक कांबळे हे नेहमीप्रमाणे शाळेत येत असताना सीड फार्माजवळ त्यांना एक पैशांचे पाकीट सापडले. पाकीट उघडून पाहिल्यानंतर त्यात पैसे आणि महत्त्वाची कागदपत्रे असल्याचे समजताच, कोणत्याही मोहाला बळी न पडता या दोघांनी ते पाकीट तातडीने शाळेतील शिक्षकांकडे आणून सुपूर्द केले.
शिक्षकांनी पाकिटाची पाहणी केली असता ते पाकीट सौ. कृष्णाबाई तुकाराम धडाम यांचे असल्याचे निष्पन्न झाले. त्यामध्ये एसटी बस पास, आधार कार्ड आणि ₹२,२००/- रोख रक्कम होती. शाळेने तत्काळ संपर्क साधून कृष्णाबाई यांचे सुपुत्र सुनील धडाम यांना विद्यालयात बोलावून घेतले आणि सर्व ऐवजासह पाकीट त्यांच्या स्वाधीन केले.
आपल्या आईचे हरवलेले पाकीट सुरक्षित परत मिळाल्याने सुनील धडाम यांनी समाधान व्यक्त करत संदेश कोरे व नैतिक कांबळे या दोन्ही विद्यार्थ्यांच्या प्रामाणिक वृत्तीबद्दल त्यांना ₹५००/- चे रोख बक्षीस देऊन गौरवले. आजच्या युगात शिक्षणासोबतच संस्कार आणि नैतिक मूल्यांचे महत्त्व अधोरेखित करणाऱ्या या दोन्ही विद्यार्थ्यांचे मुख्याध्यापक, शिक्षक आणि नागरिकांकडून विशेष अभिनंदन करण्यात येत आहे.
