आवंडी ता. आजरा(विशेष प्रतिनिधी):
देश स्वतंत्र झाल्यानंतर कित्येक दशके दळणवळणाच्या मूलभूत सुविधेपासून वंचित राहिलेल्या दुर्गम भागातील जनतेचे स्वप्न अखेर साकार झाले आहे. आजरा आगारातून 'आजरा ते आवंडी धनगरवाडा नंबर ३' (चित्रि ॲडव्हेंचर मार्गे) ही नवी एस.टी. बससेवा आजपासून अधिकृतरीत्या सुरू झाली आहे. स्वातंत्र्यानंतर पहिल्यांदाच गावात दाखल झालेल्या लालपरीचे ग्रामस्थ आणि शाळकरी मुलांनी हारतुरे घालून अत्यंत जल्लोषात व भावुक वातावरणात स्वागत केले.
विद्यार्थ्यांची खडतर पायपीट थांबली
आवंडी धनगरवाडा क्र. १, २ आणि ३ या तिन्ही वाड्यांमधून दररोज सुमारे ३० ते ४० विद्यार्थी शिक्षणासाठी विटे विभागातील शाळेत ये-जा करतात. डोंगर-दऱ्यांचा खडतर रस्ता आणि वाहतुकीचे कोणतेही साधन नसल्याने लहानग्या चिमुकल्यांना दररोज कित्येक किलोमीटर पायपीट करावी लागत होती. पावसाळ्यात व भर उन्हात होणारे विद्यार्थ्यांचे हाल लक्षात घेऊन या भागात बससेवा सुरू होणे अत्यावश्यक होते. आज प्रत्यक्ष गावात बस उभी राहिलेली पाहून विद्यार्थ्यांच्या चेहऱ्यावरचा परमानंद शब्दांत व्यक्त करण्यापलीकडचा होता.
शिक्षक आणि पालकांचा अखंड पाठपुरावा
ही बससेवा सुरू व्हावी यासाठी केवळ ग्रामस्थच लढत नव्हते, तर विद्यार्थ्यांचे शैक्षणिक नुकसान थांबावे म्हणून विटे विभागातील सर्व शिक्षकांनीही पालकांच्या खांद्याला खांदा लावून शेवटपर्यंत प्रशासनाकडे सातत्यपूर्ण पाठपुरावा केला. पालक आणि शिक्षकांच्या या संयुक्त प्रयत्नांमुळेच आज परिवहन महामंडळाने ही सेवा सुरू करण्याचा ऐतिहासिक निर्णय घेतला.
परिसराचा विकास व पर्यटनाला गती
सदर बस आजरा येथून सुटून प्रसिद्ध 'चित्रि ॲडव्हेंचर' मार्गे आवंडी धनगरवाडा क्र. ३ पर्यंत धावणार आहे. यामुळे केवळ विद्यार्थी आणि ग्रामस्थांचीच सोय झाली नसून, या परिसरातील पर्यटन व दैनंदिन दळणवळणालाही मोठी गती मिळणार आहे. स्वातंत्र्यानंतर पहिल्यांदाच सुरू झालेल्या या सुविधेबद्दल समस्त ग्रामस्थ, पालक व शिक्षकांनी एसटी महामंडळाचे जाहीर आभार मानले असून, ही बस नियमित वेळेत सुरू ठेवावी, अशी मागणी केली आहे.
