गवसे (विशेष प्रतिनिधी):
"निरोगी शरीरातच सुदृढ मन घडते आणि त्यातूनच उज्ज्वल भविष्याची निर्मिती होते," हा विचार प्रत्यक्ष कृतीत आणत केंद्रीय प्राथमिक शाळा गवसे (ता. आजरा, जि. कोल्हापूर) येथे विद्यार्थ्यांसाठी वॉटर प्युरिफायरचा (जलशुद्धीकरण यंत्र) लोकार्पण सोहळा सोमवारी मोठ्या उत्साहात पार पडला. हे जलशुद्धीकरण यंत्र पाटकर कुटुंबीयांनी कै. दीपक सुरेखा अरुण पाटकर यांच्या पवित्र स्मरणार्थ शाळेला सप्रेम भेट दिले आहे.
शाळेत शिक्षण घेणाऱ्या बालकांना शुद्ध व स्वच्छ पिण्याचे पाणी उपलब्ध व्हावे, ही गरज मुख्याध्यापक, शिक्षक आणि शाळा व्यवस्थापन समितीने पाटकर कुटुंबीयांच्या निदर्शनास आणून दिली होती. विद्यार्थ्यांच्या आरोग्याचे महत्त्व ओळखून पाटकर कुटुंबीयांनी तत्परतेने आधुनिक वॉटर प्युरिफायर उपलब्ध करून दिले. त्यांच्या या संवेदनशील निर्णयामुळे विद्यार्थ्यांच्या पिण्याच्या पाण्याचा प्रश्न कायमस्वरूपी सुटला आहे.
कार्यक्रमाची सुरुवात मान्यवरांच्या स्वागताने झाली. शाळेच्या शिक्षिका सौ. स्वाती देवरे यांनी उपस्थितांचे स्वागत केले. मुख्याध्यापक श्री. अनिल शेंडे यांनी प्रास्ताविकातून उपक्रमाची पार्श्वभूमी विशद करत पाटकर कुटुंबीयांच्या दातृत्वाची प्रशंसा केली.
कार्यक्रमाचे सूत्रसंचालन सौ. गीता तेजा यांनी केले, तर उपस्थितांचे आभार श्री. प्रकाश बडे यांनी मानले.
या सोहळ्यास शाळा व्यवस्थापन समितीचे अध्यक्ष श्री. दिगंबर पाटील, सदस्य श्री. धर्मेश पाटील, केंद्रप्रमुख श्री. मोहन इक्के यांच्यासह सर्व शिक्षक वृंद, ग्रामस्थ व विद्यार्थी मोठ्या संख्येने उपस्थित होते. "थेंब थेंब पाण्याचा, आरोग्याचा आधार… पाटकर कुटुंबीयांच्या दातृत्वाचा, विद्यार्थ्यांना अनमोल लाभ!" अशा शब्दांत उपस्थितांनी पाटकर कुटुंबीयांप्रति कृतज्ञता व्यक्त केली.
