सूरत : प्रतिनिधी,
दिवाळीच्या काळात बहुतांश आस्थापने कर्मचाऱ्यांना केवळ मिठाईचा बॉक्स, एखादी भेटवस्तू किंवा काही हजार रुपयांचा बोनस देऊन औपचारिकता पूर्ण करतात. मात्र, गुजरातमधील सूरत शहरात एका कापड व्यावसायिकाने आपल्या कर्मचाऱ्यांप्रती दाखवलेल्या दिलदारपणामुळे सर्वांची मने जिंकली आहेत. या व्यापाऱ्याने आपल्या २० कर्मचाऱ्यांना चक्क प्रत्येकी १ लाख रुपयांपेक्षा जास्त रोख रक्कम दिवाळी बोनस म्हणून दिली आहे. हातात नोटांनी भरलेली थाळी मिळताच अनेक महिला कर्मचाऱ्यांना अश्रू अनावर झाले.
पूजेच्या थाळीत १० ते ५०० रुपयांच्या नोटांचे बंडल
सुरतमधील वराछा भागात कापड व्यवसाय करणारे व्यापारी रामस्वरूप मुंडे यांनी यंदाच्या दिवाळीत आपल्या कर्मचाऱ्यांना आगळेवेगळे सरप्राइज देण्याचे ठरवले होते. साध्या लिफाफ्यात पैसे देण्याऐवजी त्यांनी पारंपरिक पद्धत निवडली. चांदीसारख्या चकचकीत पूजेच्या थाळ्यांमध्ये त्यांनी १०, २०, ५०, १००, २०० आणि ५०० रुपयांच्या नव्या कोऱ्या नोटांची बंडले आकर्षकरीत्या सजवली. त्यानंतर रामस्वरूप मुंडे आणि त्यांच्या पत्नीने स्वतः प्रत्येकी १ लाख रुपयांहून अधिक रक्कम असलेल्या या थाळ्या २० कर्मचाऱ्यांना सन्मानाने सुपूर्द केल्या.
अचानक मिळालेल्या बोनसने महिला कर्मचारी भावुक
हातात १ लाख रुपयांची रोकड असलेली थाळी पडताच कर्मचाऱ्यांचा स्वतःच्या डोळ्यांवर विश्वास बसत नव्हता. अनपेक्षितपणे मिळालेली ही मोठी रक्कम पाहून अनेक महिला कर्मचाऱ्यांचे डोळे पाणावले. त्यांनी भावुक होऊन मालक व त्यांच्या पत्नीचे पाय धरून आभार मानले आणि मिठी मारून आनंद व्यक्त केला. हा हृदयस्पर्शी क्षण सध्या सोशल मीडियावर चांगलाच चर्चेत आहे.
"हे केवळ कर्मचारी नसून माझे कुटुंब"