आजरा - प्रतिनिधी,
विद्यार्थ्यांमधील सुप्त काव्यप्रतिभेला हक्काचे व्यासपीठ मिळावे, वाचनाची गोडी लागावी आणि बालवयातच साहित्यिक अभिरुची वृद्धिंगत व्हावी, या उद्देशाने आयोजित ‘कै. श्री. सुभाष रामचंद्र चव्हाण स्मृती ऑनलाइन काव्यवाचन स्पर्धा २०२६’ मोठ्या उत्साहात संपन्न झाली. या राज्यस्तरीय स्पर्धेला विद्यार्थी व पालकांचा भरघोस प्रतिसाद लाभला असून मोठ्या व लहान अशा दोन गटांत मिळून एकूण ११८ स्पर्धकांनी सहभाग नोंदवला होता. नुकताच या स्पर्धेचा निकाल जाहीर करण्यात आला आहे.
स्पर्धेत दोन्ही गटांत विद्यार्थ्यांनी उत्तम सादरीकरण करत रसिकांची मने जिंकली. काही क्रमांकांसाठी चुरस निर्माण झाल्याने विद्यार्थ्यांना विभागून पारितोषिके जाहीर करण्यात आली आहेत.
स्पर्धेतील गुणवंत विजेते:
मोठा गट:
कु. नारायणी सूर्यवंशी, कु. मीरा सुनील हरेर, कु. अर्पिता घाटगे, कु. शुभ्रा कामते, कु. सर्वेश पाटील आणि कु. तनिष्का पाटील यांनी आपल्या प्रभावी काव्यवाचनाने यश पटकावले.
लहान गट:
कु. नारायणी हिरेमठ, कु. आराध्या कांबळे, कु. स्पृहा आठवले, कु. जान्हवी कांबळे, कु. अर्णव आजरेकर आणि कु. राहत देसाई यांनी उत्कृष्ट सादरीकरणाच्या जोरावर बाजी मारली.
स्पर्धेच्या काटेकोर आणि निष्पक्ष मूल्यमापनासाठी नंदू साळोखे, सुहास कोंडुसकर, दिपाली चव्हाण, स्वप्नाली बांबरे, अमृता सागर आणि इंद्रायणी सुतार यांनी परीक्षक म्हणून जबाबदारी पार पाडली.
पारितोषिकांचे स्वरूप व सत्कार समारंभ:
स्पर्धेतील गुणवंत विजेत्यांना रोख पारितोषिके जाहीर करण्यात आली असून प्रथम क्रमांकासाठी ₹२,०००, द्वितीय क्रमांकासाठी ₹१,५००, तृतीय क्रमांकासाठी ₹१,०००, चतुर्थ क्रमांकासाठी ₹७०० आणि पाचव्या क्रमांकासाठी ₹५०० असे बक्षिसांचे स्वरूप आहे.
लवकरच आयोजित होणाऱ्या "बालचमूच्या काव्यकळ्या" या पुस्तकाच्या प्रकाशन सोहळ्याचे औचित्य साधून सर्व विजेत्या बालमित्रांचा भव्य बक्षीस वितरण समारंभ मान्यवरांच्या उपस्थितीत पार पडणार आहे. या संपूर्ण उपक्रमाचे नेटके नियोजन व यशस्वी आयोजन किरण सुभाष चव्हाण यांनी केले. सर्व स्तरातून विजेत्या विद्यार्थ्यांचे व आयोजकांचे कौतुक होत आहे.
