आजरा (प्रतिनिधी):
येथील नामांकित आजरा हायस्कूलच्या विद्यार्थ्यांनी जिल्हास्तरीय क्रीडा स्पर्धेत उल्लेखनीय कामगिरी बजावत ४ × १०० मीटर रिले स्पर्धेत द्वितीय क्रमांक पटकावला. या घवघवीत यशामुळे शाळेच्या क्रीडा क्षेत्रातील शिरपेचात मानाचा आणखी एक तुरा रोवला गेला आहे.
दि. १३ व १४ ऑक्टोबर २०२६ रोजी आयोजित जिल्हास्तरीय क्रीडा महोत्सवात आजरा हायस्कूलच्या खेळाडूंनी सहभाग घेतला होता. वेग, अचूक ताळमेळ आणि उत्कृष्ट सांघिक समन्वयाच्या बळावर या खेळाडूंनी उपस्थितांची मने जिंकत रिले स्पर्धेत द्वितीय स्थान प्राप्त केले. या संघामध्ये उत्कर्ष उमेश जाधव, नियंत अजित पोवार, आरुष नितीन कुंभार, मोहम्मद रहीम तुला आणि ऋतुराज सागर गिरी गोसावी या विद्यार्थ्यांचा समावेश होता.
विद्यार्थ्यांना क्रीडाशिक्षक श्री. एम. एस. गोरे व श्री. एम. पी. चव्हाण यांचे मोलाचे मार्गदर्शन लाभले. या चमकदार कामगिरीबद्दल प्रशालेचे मुख्याध्यापक, उपमुख्याध्यापक, पर्यवेक्षक तसेच सर्व शिक्षक व शिक्षकेतर कर्मचाऱ्यांनी यशस्वी खेळाडूंचे मनःपूर्वक अभिनंदन करत त्यांच्या पुढील क्रीडा वाटचालीस शुभेच्छा दिल्या. खेळाडूंच्या या यशाबद्दल आजरा शहर व परिसरामध्ये त्यांचे सर्वत्र कौतुक होत आहे.