हलकर्णी ( चंदगड तालुका) प्रतिनिधी,
जीवनाच्या वाटेवर मनावर संयम, मेंदूने योग्य निर्णय घेण्याची विवेकबुद्धी आणि मनगटात कष्ट करण्याचे बळ बाळगल्यास कोणत्याही संकटावर मात करता येते. विद्यार्थ्यांनी स्वतःच्या जीवनाची दिशा ठरवताना प्रामाणिकपणा, कृतज्ञता आणि नैतिकतेची कास धरावी. आजच्या काळात मदतीसाठी धावून येणाऱ्यांची संख्या कमी होत असताना, मुलींनी स्वतःचे रक्षण करण्यासाठी सक्षम व स्वावलंबी बनणे ही काळाची गरज आहे, असे प्रतिपादन चंदगड सामाजिक वनीकरण विभागाचे वन परीक्षेत्र अधिकारी दत्ता पाटील यांनी केले.
चंदगड तालुक्यातील बागिलगे रामपूर येथील 'रामपूर विद्यालया'त आयोजित विद्यार्थी मार्गदर्शन कार्यशाळेत ते प्रमुख वक्ते म्हणून बोलत होते. कार्यक्रमाच्या अध्यक्षस्थानी विद्यालयाच्या मुख्याध्यापिका व्ही. जे. कालकुंद्रीकर होत्या.
कष्ट, प्रामाणिकपणा आणि कृतज्ञता हीच यशाची त्रिसूत्री
विद्यार्थ्यांना जीवनमूल्यांची महती पटवून देताना दत्ता पाटील म्हणाले, "तरुण वयात अनेक प्रलोभने आणि आकर्षणे समोर येतात. त्यातील योग्य-अयोग्य ओळखण्याची विवेकबुद्धी विद्यार्थ्यांनी विकसित करावी. व्यसनांपासून दूर राहून कष्टांची तयारी ठेवावी. आई-वडिलांनी घेतलेल्या कष्टांची जाणीव आणि प्रत्येकाबद्दल कृतज्ञतेचा भाव बाळगल्यास जीवन समृद्ध बनते." बदलत्या सामाजिक परिस्थितीत मुलींनी शिक्षणासोबतच मानसिक व शारीरिकदृष्ट्या सक्षम होऊन स्वसंरक्षणाचे प्रशिक्षण, प्रसंगावधान आणि आत्मविश्वास आत्मसात करावा, असा सल्लाही त्यांनी दिला.
पर्यावरणाचे दूत बना
यावेळी त्यांनी वृक्षसंवर्धन, वन्यजीव संरक्षण आणि पर्यावरण संतुलनाविषयी सविस्तर मार्गदर्शन केले. "जंगलांचे रक्षण आणि वन्यजीवांप्रती संवेदनशीलता बाळगणे हे प्रत्येक नागरिकाचे कर्तव्य आहे. विद्यार्थ्यांनी निसर्गाचे दूत बनून पर्यावरण संवर्धनाचा संदेश घराघरांत पोहोचवावा," असे आवाहन त्यांनी केले. वन सेवेतील विविध थरारक व संवेदनशील अनुभव त्यांनी कथा रूपात मांडल्याने उपस्थित विद्यार्थी व शिक्षक मंत्रमुग्ध झाले.
कार्यक्रमाच्या सुरुवातीला एम. एन. शिवणगेकर यांनी प्रास्ताविक व मान्यवरांचा परिचय करून दिला. याप्रसंगी सामाजिक कार्यकर्ते ज्ञानेश्वर पाटील, वनसेवक पांडुरंग खापरे, रवींद्र पाटील यांच्यासह विद्यालयातील शिक्षक व विद्यार्थी मोठ्या संख्येने उपस्थित होते. कार्यक्रमाचे सूत्रसंचालन प्रशांत मगदूम यांनी केले, तर राजेंद्र शिवणगेकर यांनी आभार मानले.