गडहिंग्लज (प्रतिनिधी) :
जयपूर (राजस्थान) येथे रंगणाऱ्या वेस्ट झोन आंतरविद्यापीठ महिला हॉकी स्पर्धेसाठी शिवराज महाविद्यालयाच्या कु. भक्ती शिवानंद गड्डी व कु. शिवानी शिवाजी पाटील या दोन होतकरू हॉकीपटूंची शिवाजी विद्यापीठाच्या संघात निवड झाली आहे. या दैदिप्यमान कामगिरीमुळे शिवराज महाविद्यालयाच्या शिरपेचात मानाचा तुरा रोवला गेला आहे.
संजीवनी इंजिनिअरिंग कॉलेज येथे शिवाजी विद्यापीठाची आंतरविभागीय महिला हॉकी स्पर्धा पार पडली. या स्पर्धेत भक्ती व शिवानी यांनी आपल्या उत्कृष्ट क्रीडा कौशल्याचे, चपळाईचे आणि सांघिक समन्वयाचे प्रभावी प्रदर्शन करत सर्वांचे लक्ष वेधून घेतले. त्यांच्या सातत्यपूर्ण व दर्जेदार खेळाची दखल घेत निवड समितीने त्यांची शिवाजी विद्यापीठाच्या महिला हॉकी संघात अधिकृत निवड केली आहे. ग्रामीण पार्श्वभूमी असूनही चिकाटी, कठोर सराव आणि खेळावरील निष्ठेच्या जोरावर या विद्यार्थिनींनी मिळवलेले हे यश विशेष कौतुकास्पद ठरले आहे.
या यशाबद्दल बोलताना खेळाडूंनी संस्थेचे अध्यक्ष प्रा. किसनराव कुराडे, सचिव डॉ. अनिल कुराडे, उपाध्यक्ष ॲड. दिग्विजय कुराडे, संचालिका सौ. बिनाताई कुराडे, संचालक प्रा. विश्वजीत कुराडे आणि प्राचार्य डॉ. एस. एम. कदम यांच्या प्रोत्साहन व पाठबळाचा कृतज्ञतापूर्वक उल्लेख केला.
तसेच महाविद्यालयाचे शारीरिक शिक्षण संचालक मेजर प्रा. डॉ. राहुल मगदूम, प्रा. जयवंत पाटील आणि हॉकी प्रशिक्षक श्री. सचिन पवार यांचे या खेळाडूंना मोलाचे क्रीडा मार्गदर्शन व तांत्रिक प्रशिक्षण लाभले.
महाविद्यालयाच्या दोन खेळाडूंनी विद्यापीठ संघात स्थान पटकावल्याने इतर विद्यार्थिनींसाठीही ही प्रेरणादायी बाब ठरली आहे. संस्थेच्या वतीने आणि महाविद्यालय परिवारातर्फे दोघींचेही अभिनंदन करण्यात आले असून, आगामी वेस्ट झोन स्पर्धेत उत्कृष्ट कामगिरी करून विद्यापीठाचा नावलौकिक वाढवावा, यासाठी क्रीडाप्रेमींमधून त्यांच्यावर शुभेच्छांचा वर्षाव होत आहे.