वेर्ले ता.सावंतवाडी: प्रतिनिधी,
शासनाच्या निधीची वाट न पाहता लोकसहभागातून विकासकामे कशी उभारता येतात, याचा नवा आदर्श वेर्ले गावातील फौजदारवाडी आणि लिंगवतवाडी येथील ग्रामस्थांनी घालून दिला आहे. दोन्ही वाड्यांतील नागरिकांनी एकजुटीने स्वनिधी व लोकवर्गणीतून सुमारे एक लाख रुपये खर्च करून सुसज्ज बसथांबा उभारला असून, विजयादशमीच्या शुभमुहूर्तावर सावंतवाडीचे तहसीलदार श्रीधर पाटील यांच्या हस्ते त्याचे लोकार्पण करण्यात आले.
या बसथांब्यासाठी मोकळी जागा उपलब्ध करून देणाऱ्या द्वारका लिंगवत आणि विश्राम लिंगवत यांचा यावेळी शाल व श्रीफळ देऊन विशेष सन्मान करण्यात आला.
'गाव करील ते राव काय करील' – तहसीलदार श्रीधर पाटील
लोकार्पणप्रसंगी बोलताना तहसीलदार श्रीधर पाटील यांनी वेर्ले गावातील एकजुटीचे कौतुक केले. ते म्हणाले, "रस्ते, बंधारे आणि इतर सार्वजनिक सुविधा ग्रामस्थांनी एकत्र येऊन श्रमदानातून व लोकसहभागातून मार्गी लावल्या आहेत. शासनावर विसंबून न राहता 'गाव करील ते राव काय करील' या उक्तीप्रमाणे वेर्लेकरांनी collective efforts चे (सामूहिक प्रयत्नांचे) महत्त्व दाखवून दिले आहे. हा आदर्श इतर गावांसाठी प्रेरणादायी ठरेल." याशिवाय उपस्थित शेतकऱ्यांना त्यांनी फार्मर आयडी, ई-पीक पाहणी आणि सामायिक जमिनींशी संबंधित शासकीय योजनांविषयी मार्गदर्शन केले.
सामाजिक उपक्रमांतून एकोप्याची परंपरा
प्रमुख पाहुणे म्हणून उपस्थित असलेले कोकण मराठी साहित्य परिषदेचे जिल्हा सचिव अ‍ॅड. संतोष सावंत यांनी वेर्लेकरांच्या सामाजिक बांधिलकीचे कौतुक केले. दारूबंदी, रस्ते, पाणी, वीज आणि आध्यात्मिक उपक्रमांमध्ये ग्रामस्थांनी दाखवलेली ही एकी कायम राखावी, असे आवाहन त्यांनी केले.
मान्यवरांची उपस्थिती
या कार्यक्रमाचे प्रास्ताविक डॉ. संजीव लिंगवत यांनी केले, तर सूत्रसंचालन श्री. गोसावी यांनी केले.
कार्यक्रमास सरपंच रुचिता राऊळ, ग्रामपंचायत सदस्य बाळू गावडे, गोविंद उर्फ दादा लिंगवत, लाडजी राऊळ, सोमनाथ राऊळ, माजी सैनिक बाळकृष्ण राऊळ, डॉ. संजीव लिंगवत, चंद्रकला गोसावी, ममता राऊळ, विजय राऊळ, तलाठी प्रवीण फोले यांच्यासह परिसरातील नागरिक व ग्रामस्थ मोठ्या संख्येने उपस्थित होते. लोकसहभागातून उभारलेला हा बसथांबा केवळ प्रवाशांची सोय नसून गावातील सामाजिक एकोप्याचे प्रतीक ठरला आहे.