प्रतिनिधी / विशेष वृत्त
भारतरत्न डॉ. ए. पी. जे. अब्दुल कलाम यांच्या जयंतीनिमित्त रोझरी इंग्लिश स्कूलमध्ये 'वाचन प्रेरणा दिन' अत्यंत उत्साही, चैतन्यमय आणि संस्कारक्षम वातावरणात साजरा करण्यात आला. डिजिटल युगातील स्क्रीन टाईमच्या विळख्यातून मुलांना बाहेर काढून छापील पुस्तकांच्या जादुई दुनियेची ओळख करून देण्यासाठी या वेळी विद्यार्थ्यांना पुस्तके भेट देऊन अनोखी ‘पुस्तकांची पेरणी’ करण्यात आली.
कार्यक्रमाची सुरुवात डॉ. ए. पी. जे. अब्दुल कलाम यांच्या प्रतिमेचे पूजन करून करण्यात आली. या सोहळ्याला ‘पुस्तकमित्र’ वृषाल अण्णा हुक्केरी प्रमुख पाहुणे म्हणून उपस्थित होते.
कार्यक्रमात विद्यार्थ्यांना भेट म्हणून पुस्तके देण्यात आली. पुस्तके हातात पडताच चिमुरड्यांच्या चेहऱ्यावरील आनंद आणि कुतूहल पाहण्यासारखे होते. यावेळी उपस्थित असलेले मा. संजय मोहिते सर यांनी मार्गदर्शन करताना सांगितले, "शालेय पुस्तके तुम्हाला परीक्षेत गुण मिळवून देतात, परंतु अवांतर पुस्तके जगण्याची आणि विचार करण्याची खरी दृष्टी देतात. पुस्तकांशी मैत्री करणारी मुले आयुष्यात कधीही एकाकी पडत नाहीत."
शाळेच्या मुख्याध्यापकांनी मनोगत व्यक्त करताना विद्यार्थी केवळ अभ्यासक्रमापुरते मर्यादित न राहता अवांतर वाचनावर भर देतील आणि प्रगती साधतील, असा विश्वास व्यक्त केला.
या स्तुत्य उपक्रमाचे आयोजन केल्याबद्दल शाळा व्यवस्थापन समितीचे उपाध्यक्ष मा. संदीप सासूलकर यांचे विशेष आभार मानण्यात आले. त्यांच्याच दूरगामी मार्गदर्शनातून या कार्यक्रमाची आखणी झाली. या सोहळ्यात शाळेचे मुख्याध्यापक, शिक्षकवृंद व शिक्षकेतर कर्मचारी यांनी सक्रिय सहभाग नोंदवून कार्यक्रम यशस्वी केला. पुस्तकांच्या सहवासात रमलेल्या विद्यार्थ्यांच्या उत्साहाने कार्यक्रमाची सांगता झाली.